Upat nasikop sa Talisay tungod sa drugas

CEBU, Philippines – Lain na usab nga mga mamaligyaay og shabu sa giilang "shabu tiange" sa Dakbayan sa Talisay ang nasikop sa kapulisan kagahapon sa kaadlawon, kini nahitabo pipila ka adlaw human gironda ang maong barangay sa kapolisan.

Ang mga dinakpan mao sila Danilo Balingit, 26, nakuhaan og usa ka medium pack ug 20 ka paketeng shabu; mga gipasanginlang mamarukay nga pulos nakuhaan og tag 10 ka paketeng shabu nga sila si Erwin Serrano, 49 ug ang magsuong Rowena, 28 ug Jay Dabasol, 25, tanan nagpuyo sa sitio Tunga, barangay Tanke.

Si Police Officer 3 Ferdinand Pablo sa kapulisan sa Talisay nibutyag sa Banat News nga aduna'y concerned citizen nga mitawag sa ilang buhatan ug nisumbong nga nibalik na usab sa pagpamaligya og illegal nga drugas sa ilang dapit. Matud pa susama lang og isda nga naa kilid sa karsada iplastada sa mga suspek ang ilang baligya. Dugang pa sa kapulisan nga si Balingit gyud ang nailhan nilang tigpayuhot og drugas sa maong dapit tungod kay taudtaod na nila kining gimonitor.

Samtang ang ubang mga dinakpan nailhan lang nga mamarukay.

Gibanabanang moabot sa P171,100 ang kantidad sa shabu nga nakuha gikan kanila. – /EIM) (BANAT NEWS)