Niagi’ng eleksiyon leksiyon sa Alayon

CEBU, Philippines - Giangkon sa Partido Alayon nga naleksyon sila sa niagi’ng eleksyon human sa daku’ng kapildehan ni kanhi kongresista Eduardo Gullas sa pagka-mayor sa dakbayan sa Talisay.

Ang apo ni Gullas nga si kongresista Gerald Anthony “Samsam” Gullas nibutyag sa Banat News nga kompiyansa kaayo sila niadto’ng higayuna hinungdan nga gipilde ni Mayor Johnny V. de los Reyes ang iya’ng apohan.

Matud sa batan-ong Gullas nga sila nakat-on na sa ila’ng kasaypanan ug kinahanglan nga sila ang mohatag og hugot nga baruganan sa bisan unsa nga isyu nga giatubang sa dakbayan.

Kini naglakip sa isyu sa merkado sa Tabunok, merkado sa Lagtang, mga traysikol, drainage, trapiko ug uban pa.

“Ang Alayon nagtuo nga dili kinahanglan nga mangutang ang siyudad para pagtukod sa merkado sa Tabunok ug ang Lagtang market himuon kini’ng vocational school, dili kay pasagdan lang,” matud ni Gullas.

Ang merkado mao’y usa sa daku’ng isyu sa niagi’ng piniliay gumikan sa pagsupak sa mga manindahay nga ibalhin sa Lagtang market nga proyekto sa kanhi kongresista. Samtang ang merkado ra usab ang hinungdan ngano’ng niaslom ang relasyon ni de los Reyes ug sa konseho nga pinanguluhan ni Bise Mayor Romeo Villarante.

Kini human ang mayoriya sa konseho nga kaalyado sa Alayon ang wala mohatag og pagtugot ni JVR nga makautang sa bangko sa kantidad nga P350 milyones.

Nahadlok ang konseho nga maglisud pagbayad ang siyudad sa daku’ng utang.

Matud ni Villarante nga daghang pamaagi nga matukod ang merkado o ba kaha pagpaayo sa merkado sa Tabunok pinaagi sa public-private partnership.

 Hinuon si Kongresista Gullas malaumon nga modaug na ang iya’ng apohan sunod tuig nga eleksyon gumikan kay ang mayoriya gihapon sa kapitan sa 22 ka barangay sa Talisay ang padayun nga nagsuporta ug nisalig kanila.  (BANAT NEWS)