Riprap sa Maghaway nidahili
CEBU, Philippines - Gisusi na sa taga engineering department sa kagamhanan sa dakbayan sa Talisay ang Area 2, Maghaway.
Kini ang gipahibawo ni Vince Monterde, pangulo sa City Disaster Risk Reduction Management Office human usa ka balay ang hapit mahugno niadto’ng Huwebes gumikan sa sige’ng bunok sa uwan ug nihulpa ang riprap.
Si Rose Fe Rosas, tag-iya sa balay, nibutyag nga niana’ng Miyerkules sa kadlawon nadungog nila ang haguros sa mga bato sagol yuta padulong sa ila’ng panimaye.
Ang pamilya’ng Rosas siyam na ka tuig nga nanimuyo sa lugar ug usa lang sa 16 ka balay nga nahimutang sa pangpang nga gihimo’ng relocation site.
Dali nga namalhin ang pamilya’ng Rosas sa panimaye sa ila’ng kaliwat.
Matud ni Rosas nga dili lang ang ila’ng panimaye ang nameligro lakip na ang ubang kabalayan sa ubos nga bahin.
Nasayran nga duha sab ka balay ang gibanlas ug tulo ang naapektuhan sa barangay Candulawan sa sama nga adlaw human nibunok ang kusog nga uwan ug dali nga nisaka ang tubig. (BANAT NEWS)
- Latest
