Shootout, wanted patay
CEBU, Philippines - Patay ang usa sa “top ten most wanted” sa Pardo Police Station sa dakbayan sa Sugbo human sa engkwentro tali niini ug sa mga operatiba sa Special Weapons and Tactics (SWAT), City Intelligence Branch (CIB) ug sa Pardo Police Station diha sa giabangan niyang balay sa Sitio Kalubihan, barangay Tabunok sa dakbayan sa Talisay kagahapon sa kaadlawon.
Ang mga operatiba gipangulohan ni Chief Inspector Michael Angelo Beltran, hepe sa Pardo Police Station miila sa napatay nga si Norman Maramara.
Si Beltran nagkanayon nga ilaha untang dakpon si Maramara base sa warrant of arrest nga giluwatan ni Judge Jacinto Fajardo sa Regional Trial Court (RTC) Branch 66 sa siyudad sa Talisay nga lima ka kasong pagpanglugos.
Alas 4:30 sa kaadlawon gilibotan sa mga polis ang gipuy-an sa suspek apan matud pa nakamatikod kini ug mikuha sa iyang .9mm nga pusil misuway pagpamusil sa mga polis apan naunhan.
Duha ka mga buto sa armas ang nadungog ug nahagba dayun ang suspek kinsa naigo sa tuo nga aping ug kilid sa lawas.
Matud pa ni Beltran nga gawas sa kasong rape nalambigit sab kini sa pagpanulis, pagpamusil ug ingon man sa ilegal nga drugas si Maramara.
"Mosud- gawas lang ang suspek sa Talisay ug siyudad (Cebu City) samtang mohimo og krimen," asoy pa ni Beltran sa Banat News.
Si Maramara gikaingon nga daghang mga babayeng gikauban niadtong tungora apan pag-abot sa kapulisan nag-iyahay sila og sibat.
Ang hepe sa CIB, Supt. Romeo Santander nga nahinabi sa mga tigbalita miingon nga si Maramara usa sa ilang suspek sa sagunson nga pagpamusil diha sa barangay Inayawan sa Cebu City ug sa dakbayan sa Talisay.
Nakaikyas na usab kini sa buy-bust operation sa CIB dihang nagpuyo pa kini sa Cebu City ug sinaligan kini sa usa ka drug personality. (Gabriel Bonjoc ug Jojo Ugdol/EIM)(BANAT NEWS)
- Latest
