Alayon supak sa sona libre

CEBU, Philippines - Supak sa sona libre ang mga mayor nga sakop sa Alayon Party nga pinangulohan ni Congressman Gerald Anthony "Sam-Sam" Gullas.

Kini human ang batan-ong kongresista mipasakop man sa Liberal Party. Kun sona libre na ang unang distrito wala nay mahimong oposisyon.

Si Mayor Valdemar Chiong sa siyudad sa Naga mibutyag nga nagkauyon silang mga mayor nga dili pili-pilion sa LP ang mga lugar nga ibutang sa free zone.

Sama sa nahitabo sa dakbayan sa Talisay nga si Gobernador Hilario Davide maoy mipili ni Mayor Johnny V. de los Reyes nga paluyohan sa eleksyon. Apan ang Alayon sa ilang bahin gusto nga si kanhi Kongresista Eduardo Gullas ang iyang pilion nga paluyohan.

Gani mao kini ang rason nga mibiya sa partidong LP ang orihinal miyembro nga sila Bise Mayor Romeo Villarante, mga Konsehal Danny   Caballero ug Aldin Diaz.

Matud pa ni Chiong nga kun ingon ini naman lang gani ang sitwasyon, mas maayo pa nga wala'y pilion ang gobernador kun kinsa ang iyang paluyohan aron wala’y mahiubos.

Nabalaka siyang mapasagdan sila sa kampanya ug wala'y bisan kinsa nila'ng mga kandidato ang suroyon ug pasak-an sa entablado sa gobernador.

"Dili ta magpili-pili labaw na diha sa Talisay kay si Sir Eddie baya ang amo diha nga kauban," matud pa ni Mayor Chiong sa Banat News. (BANAT NEWS)