Carolinians nagbangutan

CEBU, Philippines - Tulo ka mga campus sa University of San Carlos nipahigayon og hiniusang prayer vigil alang sa pagpangita og hustisya sa kamatayon ni Karen Kaye Montebon. Ang mga campuses naglangkob sa USC Main Campus, USC Talamban, ug  USC South Campus nagdungan sa paghimo niini.

Gatusan ka mga Carolinian sa USC Main nga nagsul-ob og itom nga t-shirts ang nagtapok uban sa mga kaparian ug magtutudlo aron mag-ampo.

Usa ka freedom wall ang gipahimutang sa atubangan nga bahin  sa gymnasium sa USC Main ug didto gisuwatan sa mga estudyante ang ilang mga mensahe, pag-ampo ug mga pagbati bahin sa nahitabo sa ilang igsuong Carolinian. Aduna say nagdagkot og kandila. Nahimong emosyonal usab ang mga nanambong sa dihang nipaambit ang best friend ni Karen nga si Lakisha Moncano kinsa nihulagway sa namatay nga buotan ug dili babag sa ilang panaghinigalaay ang estado sa ilang pagtuo ug nanghinaot siya nga mahatagan og hustisya ang kamatayon sa iyang amiga.

Samtang ang chairman sa accountancy department nga si Eleonor Paclijan, emosyonal usab dihang nihatag og pamahayag bahin sa kamatayon sa ilang estudyante.

Matud niya makab-ot unta ang hustisya alang kang Karen ug sa tanan mga biktima sa linuog nga pamaagi.

Hustisya maoy panawagan sa tanang nitambong sa prayer vigil ug laraw usab nilang magpadayon sa mga kalihukan aron makab-ot ang hustisya.

Lakip si Gob. Hilario Davide III nanawagan og hustisya alang kang Montebon ug miawhag sa kapolisan nga paspasan ilang imbestigasyon. Iya usab gipahimangnoan ang publiko nga magbantay sa ilang personal nga seguridad. (BANAT NEWS)