Tigbaligya’g shabu sa mga estudyante ‘dakpan

CEBU, Philippines – Tungod sa sumbong sa mga magtutudlo kay duna sila’y mga estudyanteng naungo na sa ilegal nga drugas, gidakop sa kapolisan sa Talamban Police Station ang duha ka mga gidudahang level 3 drug pushers nga tigbaligya og drugas sa mga bata diha sa Sitio Sugarlandia, barangay Bacayan ning dakbayan sa Sugbo sa nakalabay nga gabii.

Giila ang mga dinakpan nga sila si Johnrey Alarde, 35, ug ang iyang sinaligan nga si Carlos Miñoza.

Matud pa sa hepe sa Talamban Police nga si Senior Inspector Alvin Llamedo nga nahinabi sa Banat News, nakadawat sila og reklamo gikan sa mga magtutudlo  nga ang ilang mga estudyante tigpalitan og drugas sa duha.

Ang kapolisan milusad og buy-bust operation ug gipalitan og bale og P200 nga shabu  si Alarde hinungdan nga kini nadakpan, misuway unta sa pagdagan iyang batabata nga si Miñoza apan nadakpan usab kini.

Nakuha gikan ni Alarde ang 20 ka paketeng gituohang shabu lakip na ang buy-bust money, samtang si Miñoza  nakuhaan sab og duha ka gagmay nga pakete niini.

Sumala pa ni Llamedo nga gawas sa reklamo sa mga magtutudlo sa maong dapit daghan na sab sila’ng nadawat nga report bahin ni Alarde nga plastaran kaayo nga mamaligya og drugas bisan sa daplin lang sa dalan.

Ang suspetsado gikatahong miangkon nga gikan sa priso sa National Bilibid Prisons sa Muntinlupa City ang ilang supply nga shabu. – /EIM) (BANAT NEWS)