Kapitolyo di mosugot datahan ang 93-1

CEBU, Philippines – Dili gusto ang kagamhanan sa probinsiya nga idata-data ang P500 milyones nga tanyag sa dakbayan sa Sugbo alang sa luna sa 93-1.

Matud ni Provincial Legal Officer Orvi Ortega nga kung may gigahin ang dakbayan nga P500 milyones, tibuok unta nila kini’ng ibayad ug gawas sa mao’ng kantidad pun-an nila kini og luna nga balor og P1.3 bilyones.

Giingong ang gihangyo sa probinsiya tugbang lang sa balor sa 32 ektarya’ng luna sa 93-1 nga wala pa mabayari sa mga nag-okupar niini.

Base sa memorandum of agreement nga giduso sa kagamhanan sa dakbayan ngadto sa probinsiya, P100 milyones ang iuna pagbayad ngadto sa probinsiya.

Unya na ang kinatibuk-ang bayad kung mabalhin na sa siyudad ang titulo sa luna.

Matud ni Ortega nga dili angayang mabalaka ang mga residente sa luna tungod kay nagtinguha ang probinsiya nga may makab-ot nga kasabutan sa kasulbaran sa isyu.

Samtang sabutan tali nila’ng Mayor Michael Rama ug Gobernador Hilario Davide III ang pagsulbad sa problema.

Naghinaut si Rama nga mahinayun ang pagkita nila ni Davide sulod karong semanaha.

Kauban sa tigum mao sila si Bise Mayor Edgardo Labella, Konsehal Hanz Abella, Atty. Collin Rosell ug ang chairman sa committee on housing sa konseho nga si Konsehal Alvin Dizon. – /GMR) (BANAT NEWS)