Malcolm Tuñacao gitigbas sa kapuyo
CEBU, Philippines – Kanhi world boxing champion nga si Malcolm “Eagle Eye” Tuñacao nalandig sa tambalanan human giingong gitigbas sa iyang kapuyo kagahapon sa buntag didto sa Purok Tambis, Brgy. Umapad, Mandaue City.
Matud ni Senior Police Officer 4 Fernando Gabutero sa Opao Police Station, miila sa suspek nga si Jessica Grace Tiu, 39, nga matud pa mitigbas ni Tuñacao samtang kini natulog.
Base sa nakuha nilang kasayuran, nagkalalis ang duha niadtong Martes sa hapon tungod sa pagduda sa babaye nga aduna kini laing karelasyon.
Apan kagahapon sa buntag, sayong nakamata si Tiu ug giingong nablangko kini ug gitigbas si Tuñacao sa ulo samtang natulog, nakamata kini ug nanagang sa sundang.
Matud ni Gabutero, si Tiu ra usab ang nitabang sa boksidor padulong gawas sa ilang balay ug gidala sa Chong Hua Hospital si Tuñacao.
Gipriso na sab si Tiu sa detention cell sa Opao Police Station ug gikatakdang pasakaan og kasong frustrated murder.
Ulahing niaway si Tuñacao batok ni Ryuta Otsuka didto sa Korakuen Hall didto sa Tokyo, Japan sa miaging tuig diin nakadaog siya pinaagi sa technical decision human sa ikalimang round.
Si Tuñacao nagkupot og 35-3-3 record nga dunay 20 ka knockouts. – /EIM) (BANAT NEWS)
- Latest
