Kawani sa VGO positibo sa drug test

CEBU, Philippines – Nadugangan ang tiggamitan og ginadili’ng drugas nga mga kawani sa Kapitolyo human usa sa Vice Governor’s Office ang nagpositibo sa drug test.

Niabot na sa 740 ka kawani sa Kapitolyo ang napaubos sa drug test ug 29 niini ang positibo sukad sa niagi’ng tuig.

Matud ni Joey Herrera, executive director sa Cebu Provincial Anti-Drug Abuse Commission, nga ipaubos pa sa confirmatory testing ang resulta sa ila’ng kinalit nga drug test.

Ang CPADAC kutob lang sa paghimo sa screening sa drug test ug gipahibawo ni Herrera nga anaa na sa gobernador ang katapusang hukom apan ang sagad sa nagpositibo gitangtang na sa pwesto pinasikad sa Republic Act No. 9165 kon ang Comprehensive  Dangerous Drugs Act.

Bahad ni Herrera ngadto sa mga tiggamitan og ilegal nga drugas nga dili gihapon kaikyas nunot sa paghingusog sa administrasyon ni Gobernador Hilario Davide III sa kampanya nga “Just Say No To Drugs.”

Giklaro ni Herrera nga confidential ang resulta sa drug test ug ipaubos sa subsob nga proseso sa dili pa kini hingpit nga tangtangon sa iya’ng trabaho.

Kung job order, awtomatik kini’ng tangtangon samtang pinasubay sa balaud ang proseso sa mga regular nga kawani base sa lagda sa Civil Service Law.

Samtang sa lungsod sa Cordova, adunay unom ka job order sa munisipyo sab ang nagpositibo sa drug test niadto’ng Martes.

Matud ni Herrera nga 101 ka kawani ang gipaubos sa drug test lakip na ang duha ka konsehal sa lungsod.

Gipahibaw ni Herrera nga nibahad si Cordova Mayor Adelino Sitoy nga iya’ng panangtangon ang mga magpositibo sa drug test. – /GMR) (BANAT NEWS)