Kapitolyo mo-host sa panihapon sa mga Obispo

CEBU, Philippines – Modalit ang kagamhanan sa probinsiya og panihapon sa mga Obispo nga mopahigayun og plenary assembly sa Sugbo karong Enero. Ang mao’ng mga Obispo motambong sa 51st International Eucharistic Congress (IEC). Si Gobernador Hilario Davide III nibutyag nga niuyon siya sa hangyo ni Cebu Archbishop Jose Palma nga mo-host og panihapon alang sa mga arsobispo nga moanhi sa Sugbo.

Kagahapon sa buntag ang grupo ni Monsignor Ruben Labajo nibisita sa buhatan sa gobernador ug personal nila’ng gitunol ang suwat ni Palma alang sa nahisgutang hangyo.

Si Labajo, overall chairman sa accommodation sa IEC, nagkanayon nga 100 ka Obispo ang moanhi sa Sugbo nga motambong sa Catholic Bishops Conference of the Philippines (CBCP) plenary assembly.

Ang CBCP dunay ipahigayun nga duha ka assemblies sa buwan sa Enero ug Hulyo sunod tuig. Ang una’ng plenary assembly ipahigayun sa Sugbo tungod kay anhi man ipahigayun ang IEC.

Matud ni Labajo nga ang mao’ng assembly usa ka historic event tungod kay una kini’ng higayun nga ipahigayun sa Sugbo tungod kay kasagaran adto sa Manila.

Ang plenary assembly ipahigayun duha ka adlaw sa dili pa buksan ang IEC. Gibutyag ni Labajo nga aduna sila’y gihangyo sa kagamhanan sa probinsiya diin usa na niini ang pag-welcome nila unya sa mga Obispo nga moanhi. Dugang ni Labajo nga sa Enero 24, 2016 sa udto ang pagtak-op sa plenary assembly ug buksan usab ang IEC sa mao’ng petsa. – /GMR) (BANAT NEWS)