Pagtukod og merkado di ipaagi sa utang–Eduardo Gullas
CEBU, Philippines – Tukoron ni kanhi kongresista Eduardo Gullas ang bag-ong merkado sa Tabunok nga dili pinaagi sa utang sa higayon nga mapili siya pag-usab nga mayor sa dakbayan sa Talisay sa 2016 nga eleksiyon.
Ang pahibawo ni Gullas atol sa 888 News Forum sa Marco Polo Plaza kagahapon sukwahi sa plano sa administrasyon ni Mayor Johnny V. delos Reyes nga mangutang og P387 milyones aron matukod ang merkado nga gibabagan sa mayoriya sa konseho.
Matud ni Gullas nga anam-anam ang pagtukod sa merkado hangtud makompleto ug dili na matandog ang mga manindahay.
Butangan usab og covered parking area alang sa mga sakyanan, traysikol ug traysikad ang bag-ong merkado sa iyang plano.
Samtang plano ni Gullas nga himuong technical-vocational training center sa Technical Education and Skills Development Authority ang merkado sa Lagtang.
Nakontrobersiyal ang pagbalhin sa mga manindahay gikan sa Tabunok ngadto sa Lagtang atol sa administrasyon ni kanhi mayor, karon Konsehal Socrates Fernandez, gumikan sa pagsupak sa mga manindahay ug gituohang hinungdan nga napilde si Gullas ni delos Reyes sa 2013 nga eleksiyon.
Ang pagpabalik sa mga manindahay sa Tabunok maoy usa sa saad ni delos Reyes sa iya’ng kampanya.
Ang niagi’ng State of the City Address ni delos Reyes gipahigayon sa merkado sa Tabunok aron pagpahibawo sa katawhan sa pagbabag sa mga konsehal nga gipangulohan ni Bise Mayor Romeo Villarante sa pagpatukod sa bag-ong merkado. – /EIM) (BANAT NEWS)
- Latest
