112 botika substandard ang mga tambal

CEBU, Philippines – Dili momenus 112 ka mga establisamento sa tibuok Central Visayas ang nasuta sa Food and Drug Administration sa Department of Health (DOH)-7 nga substandard ang gibaligyang tambal.

Ang uban kanila gipasirad-an sa FDA samtang dunay uban ang gipadad-an og notice of violation depende sa gibug-aton sa nahimong kalapasan.

Matud sa pangu sa Food and Drug Section sa DOH-7, Sarah Oriol sagad sa nakalapas sa balaod ania sa Sugbo.

Gikan sa buwan sa Enero hangtod sa buwan sa Agosto ning tuiga 112 ka mga establisamento ang ilang nasuta nga nakalapas sa balaod sa pagpaninda og tambal.

Nasayran nga dul-an sa usa ka libo ka botika ug mga tindahan nga namaligya og tambal ang target sa FDA nga masusi matag tuig.

Sigon ni Oriol, sagad sa ilang nasakpan walay lisensya nga makabaligya og tambal.

Ang DOH-7 Regional DirectorJaime Bernadas mipahimangno sa publiko nga dili mopalit og tambal sa mga sari-sari stores tungod kay dili masiguro ang kalidad sa tambal.

Ang mga botika kinahanglang adunay Certificate of Product Registration ug Certificate of Good Manufacturing Practice aron makonsiderar nga maayo ang kalidad ang  tambal nila nga gibaligya.

Pagmatuod usab kini nga nisubay sila sa balaod sa pagpaninda og tambal ug gikan sa rehistradong pharmaceutical companies sila nikuha niini.

Aduna usab silay mga nasakpang mga sub-standard nga tambal nga kuwang ang dosage sa kun unsay naa sa pakete niini ug duna say tambal nga di mao ang sud maong nabutang sa peligro ang mga makatumar niini.

Sumala pang Bernadas angay nga magbantay ang publiko kun barato kaayo ang tambal kay posible nga sub-standard kini.

Giawhag niya kadtong mamalit og tambal nga batasanon nga mangutana sa generic names sa tambal nga gireseta kanila aron makapili sila og mas barato nga brand. – /EIM) (BANAT NEWS)