Yapha di na makig-atbang ni Gwen
CEBU, Philippines – Dili na makig-atbang pagbalik si kanhi Pinamungajan mayor Geraldine “Gaye” Yapha kang Kongresista Gwendolyn Garcia sa ikatulo’ng distrito sa probinsiya sa Sugbo sunod tuig nga eleksiyon.
Si Yapha nipahibawo nga mopapili siya sa pagka-mayor sa lungsod sa Pinamungajan diin siya nakaserbisyo isip mayor sa siyam ka tuig.
Nasayran nga gisibog ni Yapha ang iya’ng protesta nga gipasaka batok ni Garcia sa House of Representatives Electoral Tribunal (HRET) gumikan sa kalangan sa pagresolbar samtang hapit na sab ang laing eleksiyon.
Hunyo 30, 2015 giduso ni Yapha ang iya’ng mosyon sa pagsibog sa protesta apan Hunyo 8, 2015 may desisyon na ang HRET nga nagproklamar kang Garcia nga mananaug sa 2013 nga eleksiyon.
Ikapares gihapon ni Yapha ang iya’ng pag-umangkon nga si Bise Mayor Maria Honeylette Yapha-Lingad kinsa makapasubli pa sa iyang katapusang termino sa 2016 nga eleksiyon.
Ikaatbang ni Yapha ang kaalyado ni Garcia nga si Mayor Glenn Baricuatro kinsa nipilde ni kanhi mayor ug bokal Estrella Yapha, inahan ni Geraldine, niadto’ng 2013.
Wala pa’y laing pangan nga nitumaw nga makig-atbang kang Garcia sa pagka-kongresista sunod eleksiyon.
Ang usa sa lig-ong kandidato sa Liberal Party nga si Tuburan Mayor Democrito Diamante Jr. nipahibawo na usab nga dili siya makig-atbang ni Garcia sa pagka-kongresista.
Si Toledo City Mayor John Henry “Sonny” Osmeña nga kaalyado sa amahan ni Geraldine nga si Bise Mayor Antonio Yapha Jr. sa LP nipadayag na usab sa iya’ng suporta kang Garcia. (BANAT NEWS)
- Latest
