2 motor nagsungag, 3 angol
CEBU, Philippines – Naangol ang tulo ka tawo human ang motorsiko nga gisakyan kalit lang nagkasungag diha’ng nagkasugat sa Curba, dakbayan sa Danao.
Si Senior Police Officer 1 Reynante Manulat sa traffic section sa Danao City Police Station niila sa nagsakay sa Honda XRM nga si Reynante Giangan, 40, taga Magtagobtob, sa mao’ng dakbayan.
Ang iya’ng angkas mao si Jolan Hermocilla, 32 , taga Ylaya, sa mao gihapon nga dakbayan ug ang gikasungag mao ang laing XRM nga motor nga gimaneho ni Jeffrey Campos, 26, taga lungod sa Carmen.
Nagdagan subay sa dalan national ang duha ka motorsiklo gikan sa managlahi nga direksiyon apan diha’ng nahidangat sa mao’ng dapit kalit nagkasungag.
Nalamba ngadto sa sementado’ng karsada ang duha ka motorsiklo ug ang mga nagsakay niini nangalagpot.
Nakaangkon og grabe’ng kadaut sa ila’ng kalawasan ang tulo ka biktima hinungdan nga dali sila’ng gidala sa Danao Provincial Hospital. – /GMR) (BANAT NEWS)
- Latest
