DOH motabang sa city jail
CEBU, Philippines - Andam motabang ang Department of Health-7 sa problema sa Cebu City Jail kabahin sa pagsaka sa kaso sa mga nangasakit nga piniriso. Apan matud ni DOH-7 Director Jaime Bernadas nga ang mga tinugyanan sa City Health Department ang una nga motubag sa problema ug mangayo sila og tambal.
Sa buwan sa Agosto, adunay natala nga 402 ka piniriso nga nangasakit.
Sigun pa sa pangulo sa Cebu City Disaster Risk Reduction Management Office, Konsehal Dave Tumulak, nga nangayo na sila og tabang kang Dr. Daisy Villa, pangulo sa CHD, aron mahatagan og tambal ang prisohan ug matud pa sa sunod semana na kini mahatag.
Ang DOH-7 niklaro nga kung magkinahanglan ang lokal nga kagamhanan sa ila’ng tabang andam sila motabang ug mohimo og pakisusi aron mapugngan ang pagkuyanap sa tinubdan sa sakit.
Usa sa problema nga giatubang sa CCJ ang septic tank nga giingong niawas ug matud ni Bernadas nga posible nga usa kini sa gigikanan sa sakit sa mga piniriso ingon man mga residente duol sa prisohan. Gibutyag ni Bernadas nga kung sanitation ang estoryahan, ang nagdumala na sa CCJ ang dunay responsibilidad ug kini mao ang Bureau of Jail Management and Penology (BJMP).
Kinahanglan usab nga ubos sa standard sa lokal nga kagamhanan ang istruktura sa septic tank aron dili kini makalapas sa balaud sama sa Clean Water Act.
Matud ni Bernadas nga importante kaayo nga adunay water treatment facility ang matag edepisyo aron limpyo ang tubig nga mogawas gikan niini. (BANAT NEWS)
- Latest
