Mabdos nadakpan sa shabu tiange
CEBU, Philippines - Usa ka gipasanginlang drug pusher ang napusilan samtang laing tulo lakip ang usa ka mabdos ang nasikop sa mga otoridad sa usa ka operasyon diha sa barangay Tangke sa dakbayan sa Talisay sa miaging gabii.
Ang mga sakop sa Criminal Investigation and Detection Group (CIDG-7) mironda sa giilang "shabu tiange" sa lugar human sila nakadawat og impormasyon nga aduna niini sa maong barangay.
Ang napusilan mao si Roger Villarias Dejoras, 28, ug nakaangkon og samad sa tuo nga tiil dihang kalit kining mibutho ug misuway pagdunggab sa mga polis.
Samtang ang usa pa ka buwang mabdos nga nadakpan mao si Rose Sheila Ong Torres, 31, ug laing babaye nga dinakpan mao si Jalen Nocos Gonzales, 31, taga barangay San Roque samtang ang lalaking dinakpan mao sila si Gabby Oca Abapo, 28, pulos nakuhaan og mga pinaketeng shabu.
Nakuha gikan kang Dejoras ang usa ka 12 pulgadang kutsilyo.
Si Superintendent Marlon Tayaba, acting regional officer sa CIDG-7 nagkanayon nga ilang gikonsiderar nga level 3 drug pushers ang mga dinakpan.
Ang team leader sa maong operasyon nga si Chief Inspector Maximo Sumig-ang misaysay nga ang subject sa ilang buy- bust operation mao ang usa ka naila lang sa angga nga “Insik” apan nakaikyas kini paghamag sa mga polis.
Misuway sa pagpalit og shabu ang poseur buyer gikan kang Insik apan nakamatikod kini nga mga polis ang iyang katransaksyon ug daling mikaratel og dagan.
Atol sa komosyon sa mga tawo gikatahong kalit miabot si Dejoras nga armado og kutsilyo ug misuway sa pagdunggab sa mga polis apan naunhan siya sa pagpusil sa mga operatiba. Gidala si Dejoras sa Don Vicente Sotto Memorial Medical Center (DVSMMC) ug kini nakagawas ra human nga gitambalan ang iyang samad.
Nakuha sa mga polis sa lugar ang 316 ka paketeng gidudahang shabu nga gibanabanang mokabat og P200 mil.
Si Tayaba nagkanayon nga daw sama lang og namaligya og isda ang mga durugista sa maong dapit base sa nakuha nilang video footage sa ilang surveillance sa lugar. (BANAT NEWS)
- Latest
