Rugby boys sa siyudad gipanghipos

CEBU, Philippines - Gihipos sa mga awtoridad ang mga minor de edad nga gituohang tighingos og rugby ug ilegal nga drugas nga namuyo ilawom sa mga taytayan sa dakbayan sa Sugbo.

Usa ka rescue operation ang gipahigayun sa Police Coordinating and Advisory Council (PCAC) nga gipangulohan ni Bise Mayor Edgardo Labella uban ang Department of Social Welfare and Services, mga opisyal sa barangay Mabolo ug Banilad, tanod ug kapolisan.

Matud ni Labella nga ang mga batan-on nga gipang-rescue dili taga dakbayan sa Sugbo apan sagad kanila gikan sa dakbayan sa Carcar, Mandaue ug lungsod sa Consolacion.

Ang kilid sa sapa sa barangay Mabolo ug ilawom sa tulay atbang sa usa ka mall sa Banilad ang giingong gihimo’ng pinuy-anan sa mga batan-on ug tagoanan kung makakawat gikan sa mga pasaheroan nga jeepney.

Plano ni Labella nga ibutang ang mga batan-on nga na-rescue sa buhatan sa DSWS ug ang uban nga adunay pamilya sa probinsya ila kini papaulion. Ang lakang nga gihimo sa PCAC tubag sa mga reklamo ug problema sa kapolisan ug tanod sa duha ka barangay. (Sheriza Mae R. Uy/GMR)(BANAT NEWS)