Call center gironda

CEBU, Philippines - Kapin sa 60 ka mga Japanese nationals ang gidakop sa National Bureau of Investigation(NBI)-7 atol sa ilang gihimong pagpangronda sa usa ka call center company nga nahimutang sa usa ka building sa IT Park, Barangay Apas dakbayan  sa Sugbo kagahapon sa hapon.

Ang ngalan sa kompanya nga gironda mao ang Japan Intertrade Callcenter Corporation (JICC) nga usa ka service provider nga gipanag-iya og mga Japanese.

Ang operasyon gipahigayon pinasikad sa search warrant nga giisyu ni Executive Judge sa Municipal Trial Court in Cities (MTCC) Branch 1 Monalila Tecson.

Matud sa Assistant Regional Director sa NBI-7 Atty. Augusto Eric Isidoro, duna silay nadawat nga impormasyon labot sa mga Japanese national nga nagtrabaho sa maong kompanya nga giingong walay Alien Employment Permit(EMP) gikan sa Department of Labor and Employment(DOLE)-7.

Matud pa niya paglapas kini sa Presidential Decree 442 ilabi na sa Article 40 kon alien employment kay base sa balaod gikinahanglan nga mokuha sila og EMP aron legal nga makatrabaho dinhi.

Ang NBI nakig-alayon dayon sa DOLE-7 ug Bureau of Immigrations-7 ug nakompirmar ang maong impormasyon hinungdan sa pagkuha nila og warrant.

Ang mga gidakop walay napakita nga EMP ug mag-atubang sila og silot diin mahimo silang mapriso sulod sa tulo ka buwan ngadto na sa tulo ka tuig ug mahimo usab sila nga makamulta og usa ka libo ngadto na sa P10 mil ug ipa-deport.

Ang mga Japanese lang ang giaresto samtang ang mga Filipino nga call center agents gipapauli. Ang kapitan sa Barangay Apas Ramil Ayuman nakurat nga dunay mga ingon ani sa iyang barangay ilabi na nga wala siyay nadawat nga reklamo batok sa mga dinakpan.

Ang mga representante sa DOLE-7 ug BI-7 wala una mohatag og pamahayag tungod kay ila pang gipaabot ang kompletong report sa NBI-7. (Decemay P. Padilla/EIM)(BANAT NEWS)