Mga priso sa CCJ nangasakit

CEBU, Philippines - Mga priso sa Cebu City Jail gikatahong nangasakit ilabi na ang sakit sa baga, sexually transmitted disease ug hypertension tungod sa kahuot ug kahugaw na sa maong pasilidad.   Kini maoy gibutyag ni Cebu City Disaster Risk Reduction  Management Council (CCDRRMC) Konsehal Dave Tumulak human sa gihimo nilang inspeksyon kagahapon.

“Even if they are prisoners, they also have the right sa health services,” matud ni Tumulak.

Si Tumulak modangop ngadto sa Cebu City Health Department (CHD) aron mahatagan og tambal ang mga priniriso ug andam usab sila mogamit og pundo sa Peace and Order Program.

Hinuon gibutyag ni Tumulak nga matag buwan sa Agosto namatikdan nga mosaka gyud ang kaso sa nagkalain-laing sakit ug gilauman pa kini nga mas mosaka pa sa pagsugod sa El Niño. Base sa talaan, nisaka ang gidaghanon sa dunay hypertension, Urinary Tract Infection (UTI), Sexually Transmitted Disease (STD), piskat, pulmonya ug uban pa sulod sa prisohan.

Matud ni Tumulak nga kinahanglan nga limpyo ang prisohan aron paglikay sa pagtaas pa sa mga sakit sa mga priniriso.

Sa laing bahin, mireklamo ang mga lumolupyo sa Brgy. Kalunasan tungod kay niawas ug nangalisbo sa ilang lugar ang hugaw gikan sa tanke sa kasilyas sa maong prisohan. Kagahapon gilimpyohan sa CCDRRMO ug Department of Public Service (DPS) ang nahisgutang dapit. Usa sa gidudahan ni Tumulak nga hinungdan sa pagkaguba niini mao ang pagdahili sa yuta sa Brgy. Sapangdako.  (BANAT NEWS)