29-anyos namatay sa AIDS, duha ka anak natakboyan

CEBU, Philippines - Usa ka  29-anyos nga inahan ang namatay sa sakit nga Acquired Immune Deficiency Syndrome (AIDS) dinhi sa dakbayan sa Sugbo, samtang duha ka mga anak niini nga nagpangidaron ug 9-anyos ug 2 -anyos nagpositibo usab sa Human Immunodeficiency Virus (HIV).

Sa death certificate sa maong ginang, Acquired Immunodeficiency Syndrome ang hinungdan sa iyang kamatayon. Namatay siya  sulod sa ilang panimalay kagahapon sa buntag.

Ang igsuon sa namatay nga nahinabi sa Banat News nibutyag nga bag-o lang siya nasayod sa tinuoray nga sakit sa iyang manghod sa dihang kini na ospital sa nilabay nga bulan.

Matud pa niya,  nitug-an kaniya ang iyang manghod nga dul-an sa napulo na kini ka tuig nasayod nga naa siya’y HIV apan wala lang mosulti kay nahadlok nga basin og dili kini dawaton sa iyang pamilya.

Sumala pa sa igsuon, kung nasayod pa sila sa sayo pa iya gihapon kining hangpon ug patambalan ug dili isalikway kay iya man kini nga igsuon.

Miangkon ang igsuon nga usa ka commercial sex worker ang iyang manghod ug tiggamitan usab kini og injectable drugs ug ang kaniadto kapuyo sa iyang manghod nasakit usab og HIV nga una na usab nga namatay.

Gibutyag niya nga dunay tulo ka mga anak nga gibiyaan si Ana diin ang maguwang nga 9-anyos ug 2-anyos nga kamanghuran nagpositibo usab sa HIV.

Nangayo sila karon og pagsabot gikan sa katawhan alang sa mga bata nga nailo. Gusto unta niyang tabangan ang mga pag-umangkon apan wala siya’y ikasarang pagbuhi ug pag-atiman kanila maong nangayo siya og tabang. Nasayran usab nga ang amahan sa 2-anyos gikatahong anaa karon sa prisohan.

Usa sa nagpakabana karon sa pamilya mao ang SVD Friends of the Poor and the Marginalize kinsa nangusog usab sa kampanya batok sa HIV-AIDS pinaagi sa impluwensya sa Simbahan.

Si Brother Paul Bongcaras, SVD, pangulo sa Friends of the Poor and the Marginalize, miingon nga kinahanglang wagtangon na ang “stigma” o ang kahadlok sa publiko sa mga nataptan og HIV-AIDS.

Matud niya kinahanglan silang tabangan ug likayan ang paghimo sa mga butang nga maoy hinungdan sa pagtakboy niini.

Si Dr. Daisy Villa, ang pangulo sa City Health Department, nibutyag nga tuig 2010 pa nila nasayran nga dunay HIV ang maong ginang ug nasayod silang usa kini ka commercial sex worker ug tiggamitan pa gayud og injectable drugs.

Matud pa ni Villas, dili nila regular nga ma-checkup ang maong babaye tungod kay pirme kining wala sa ilaha ug niadtong bulan sa Hulyo kini nibalik sa ilaha apan luya na ang lawas.

Sumala pa ni Villa, gitambalan una nila balig duha ka semana ang sakit niini nga tuberculosis, ug niadtong nilabay nga semana gisugdan na usab ang paghatag nila niini og anti-retro viral niini apan nagkahuyang na ang lawas niini.

Giklaro ni Villa nga mahimo rang mahaya ang patay’ng lawas niini diha sa ilaha apan kinahanglang sundon sa punerarya ang tanang safety precaution samtang nag-embalsamar sa lawas.

Sa pagkakaron, ang CHD  nag-monitor sa kahimtang sa mga anak sa maong ginang ug nangita sila og institusyon diin sila mapahimutang aron duna silay moral support nga madawat.

Gipanawagan ni Villa ang publiko nga sabton ang kahimtang sa mga tawong natakboyan sa maong sakit ilabi na sa mga bata ug di sila angay hukman tungod niini.

Subli siyang nanawagan niadtong mga tawo nga nalambigit sa di luwas nga pakighilawas, paggamit og ilegal nga drugas nga di mauwaw pagpangonsulta kanila tungod kay aduna silay mga kahimanan ug mga tambal nga sarang magamit aron mapugngan ang paggrabe niini.  (BANAT NEWS)