Mega Cebu 2050 suportado sa PB

CEBU, Philippines – Gisuportahan sa hunta probinsiyal ang mga proyekto ubos sa Mega Cebu Vision 2050 nga gidumala sa Metro Cebu Development and Coordinating Board diin sakop ang kagamhanan sa lalawigan sa Sugbo.

Usa ka resolusyon nga gipangamahan ni Bokal Christopher Baricuatro ang giduso sa pagsuporta sa roadmap study alang sa sustainable urban development sa Metro Cebu. Lakip sa mga proyekto ang circumferential road nga magsumpay sa bukirang bahin sa habagatan ug amihanan, feasibility study sa mass transit network, study sa integrated flood drainage system, feasibility study sa port construction ug solid waste management master plan.

Ang Japan International Cooperation Agency (JICA) ang nagpahigayon sa roadmap study sa proyekto.

Ang pagtuon naglangkub sa short-long-term infrastructure projects ug priority projects.

Ang priority projects gilangkuban sa Cebu-Mactan dual mode bridge mass transport systems, road widening projects, traffic signal lights, suburban highway gikan sa dakbayan sa Naga ngadto sa Danao ug Cebu City-Cordova bridge.

Lakip niini ang mass transport systems sama sa Bus Rapid Transit (BRT), Metro Rail Transit (MRT), Light Rail Transit ug Automated Guideway Transit (AGT) systems. – /GMR) (BANAT NEWS)