Nagduwa sa liga gidunggab

CEBU, Philippines – Kritikal ang kahimtang sa usa ka basketbolista dihang gidunggab  sulod sa basketball court alas 8 kagahapon sa gabii sa Sitio Cansubing, Barangay Day-as lungsod sa Cordova.

Si Senior Police Officer One Laurencio Wagwag sa Cordova Police Station miingon nga ang biktima mao si Jimmy Modillo Magale, 24, nagpuyo sa Bag-ong Dalan sa Brgy. BangBang sa maong lungsod usa sa mga player sa gibuksan nga liga sa maong dapit.

Dugang pa ni Wagwag nga samtang nagpaabot na sa pagsugod sa ilang duwa kalit kining gidasmagan sa suspetsado nga si Noel Bantasan dayong sukmag sa nawong sa biktima.

Matud pa ni Wagwag nga bisan nasarasay ang biktima nakahigayon kini pakigharong ug nakigsinukliay sa kinumo apan dihang nalupig ang suspek miibot kini sa giluklok nga kutsilyo dayong dunggab sa bukobuko sa biktima.

Dali dayong midagan ang suspetsado paingon sa gawas sa basketball court ug mipaingon sa ngitngit nga dapit ug wala kini madakpi sa mga polis.

Dali nga gidala ang biktima sa Mactan Doctor Hospital ug padayon pa kining giatiman sa mga doktor sa maong tambalanan. – /EIM) (BANAT NEWS)