Czech ug bayot nga nag-oral sex gibuhian
CEBU, Philippines – Nakagawas na sa prisohan ang Czech national ug ang usa ka bayot nga nasakpan sa duha ka guwardiya nga nag oral sex sa parkingan sa Mango Square niadtong nakalabay nga kaadlawon human wala na mopadayon pa pagpasaka og kaso ang nakadakop kanila.
Kini ang gitug-an ni Police Officer 2 Alexander Terado ang desk officer sa Fuente Police nga nahinabi sa Banat News.
Matud pa ni Terado nga kagahapon sa ala-una sa hapon ilang gipagawas ang 24-anyos nga langyaw ug ang 26- anyos niyang kaubang bayot.
Ang nakabutang sa police blotter nga ang rason sa pagpagawas kanila mao ang “humanitarian consideration” ug “not interested to file a case” sa duha ka guwardiya nga sila si SG Jefferson Narvasa ug SG Junrey Bardago.
Sa wala pa gibuhian ang duha, gitug-an sa officer in-charge sa Fuente Police Station nga si Chief Inspector David Señor nga mihangyo kanila ang consul sa Czech Embassy nga kung mahimo pabuhian ug i-settle na lang ang isyu batok sa ilang kababayan.
Apan si Señor miingon nga dili sila makabuot kay dili man ang mga polis ang nakadakop ug dili ‘sab sila ang reklamante. Ang duha mahimo untang makasohan og grave scandal subay sa balaod sa Pilipinas.
Ang duha nasakpan sa mga guwardiya nga nagbuhat og malaw-ay diha sa parkingan. Ang bayot miangkon sa alegasyon apan ang langyaw miinsister nga walay nahitabo kanilang duha. – /EIM) (BANAT NEWS)
- Latest
