Truck ban sa ceremonial routes sa Mandaue gilibkas

CEBU, Philippines – Hingpit na nga libkason ang gipatuman nga truck ban sa mga ceremonial routes sa dakbayan sa Mandaue  sugod ugmang adlaw apan ang regular truck ban nga daan nang gipatuman magpadayon.

Ang truck ban sa ceremonial routes gipatuman nunot sa pagpahigayon sa Asia-Pacific Economic Cooperation (APEC) Meet.

Si Glenn Antigua nga maoy executive officer sa Traffic Enforcement Agency of Mandaue (TEAM) nga nahinabi sa Banat News  miingon nga makaagi na pagbalik ang mga sakyanan sa mga dalan nga gihimong ceremonial road sa APEC.

Ang maong mga dalan mao ang dalan U.N. Avenue, Plaridel ug lahos na ngadto sa Ouano Avenue  paingon sa dakbayan sa Sugbo.

Ang ipadayong truck ban sa siyudad  sama sa gihapon magsugod alas 6 sa buntag hangtod sa alas 8 sa buntag ug   alas 5 sa hapon hangtod sa alas 7 sa gabii matag adlaw.

Si  Antigua miingon nga magpadayon usab ang dry run alang sa one way lane nga molungtad og 60 ka adlaw alang sa gihimo nilang pagtuon sa kahimtang sa dagan sa trapiko sa dakbayan. – /EIM) (BANAT NEWS)