Koreano nanglugos og 17-anyos
CEBU, Philippines – Gibalhog sulod sa detention cell sa Presinto 2 sa Lapu-Lapu City Police Office (LLCPO) ang usa ka Korean national nga gireklamo og pagpanglugos sa usa ka 17-anyos nga dalagita sulod sa usa ka lawak sa usa ka resort sa Sitio Buyong, Barangay Maribago, Dakbayan sa Lapu-Lapu niadtong Biyernes sa gabii.
Si Police Officer 1 Marlon Britania sa Presinto 2 sa LLCPO miingon nga gitanggong nila karon ang 49-anyos nga Koreano kinsa nagpuyo sa nahisgotang resort nga mao usab iyang gitrabahoan.
Matud pa ni PO1 Britania nga nagbakasyon ang biktima nga usa ka tinun-an kuyog sa mga higala dinhi sa Sugbo dihang ilang nahimamat ang maong langyaw ug nakauban sa pag-inom.
Nianang pagkagabii, nahubog ang biktima ug gikatahong gidapit sa maong langyaw ngadto sa iyang lawak kay aduna kini ihatag nga mahalong regalo. Matud pa ni Britania misanong ang biktima apan pag-abot didto sa lawak gikatahong gilugos kini sa suspek, apan tungod sa kahubog wala siya makapanalipod sa kaugalingon hangtud nga nilampos kini paglugos kaniya.
Human sa hitabo misumbong ang biktima sa kapolisan hinungdan sa pagkasikop sa suspek diha gihapon sa maong resort.
Ang biktima gidala na sa Vicente Sotto Memorial Medical Center alang sa eksaminasyon samtang ang suspek gipaabot nga pasakaan karong adlawa og kaso. – /EIM) (BANAT NEWS)
- Latest
