Nagpuyo sa tukuran sa crisis center papahawaon

CEBU, Philippines – Gipadalhan na og demand letter sa Kapitolyo ang duha ka pamilya nga nagpuyo sa lote sa probinsiya sa Sudlon, Lahug, dakbayan sa Sugbo nga nakalangan sa pagpatukod sa Women and Children Crisis Center.

Matud ni Provincial Legal Officer, Atty. Orvi Ortega, nga sa wala pa mapadalhi og demand letter ang mao’ng mga pamilya, gi-estorya nila kini ug gipasabot.

Apan human sa panag-estorya, giingong nangayo na usab og laing pabor ang mga pamilya kinsa ibalhin unta sa relocation site sa lungsod sa Minglanilla apan nihangyo nga anha lang sila sa Kalunasan.

Gibutyag ni Ortega nga dunay miscommunication nga nahitabo tungod kay sa una’ng nasabutan nga gub-on ang mga balay sa mao’ng mga residente ug temporaryo sila’ng ibalhin sa duol nga lugar. Apan ang mao’ng mga residente wala na mosugot ug gusto nila nga samtang giguba ang ila’ng gipuy-an makabalhin na dayun sila sa Kalunasan.

Hangtud karon wala pa mohawa ang mga residente hinungdan nga gipadalhan kini og demand letter.

Kung dili gihapon mohawa ang mao’ng mga residente, ang Provincial Administrator ug Provincial Engineer adunay himuon nga lakang.

Gawas sa pagpapahawa sa mao’ng mga pamilya, naghuwat pa usab ang probinsiya sa permit gikan sa Department of Environment and Natural Resources (DENR) aron maputol ang mga kahoy sa lote. – /GMR) (BANAT NEWS)