Kamagong, Cabantan pahawanan

CEBU, Philippines – Ang kadagkoan sa Cebu City Transportation Office (CCTO) miawhag sa City Legal Office nga padad-an nila og demanda ang mga tag-iya sa ilegal nga estraktura daplin sa Kamagong ug Cabantan Streets aron panggub-on kay nakahasol kini sa pag-agi sa mga sakyanan.

Si Rey Gealon, executive officer sa CCTO, miingon nga ang Kamagong Street magamit unta aron anha moagi ang ubang sakyanan ug sa ingon mamenosan ang kahuot sa trapiko sa Gorordo Avenue.

Ang Kamagong Street mao ang karsada nga anaa magsubay kilid sa Lahug Elementary School ug adto molusot sa Escario Street kilid sa Parklane Hotel. Walay ganahan moagi sa mao nga dapit kay hagip-ot ang karsada tungod sa illegal structures.

Samtang ang Cabantan Street mao ang karsada nga nagdugtong sa Archbishop Reyes Avenue paingon sa Cardinal Rosales Avenue nga sakop na sa Cebu Business Park.

Ang Cabantan Street nga sakop sa Barangay Luz gamay na lang ‘sab tungod kay ang ubang balay daplin sa karsada miabot na sa agianan sa mga sakyanan. – /RUB) (BANAT NEWS)