Kuya Nick giduso mag-bise mayor
CEBU, Philippines – Giduso sa nagkalainlaing pundok sa dakbayan sa Toledo ang numero uno nga konsehal, Ricardo “Kuya Nick” Pepito, nga padaganon sa pagka-bise mayor sa 2016 nga eleksiyon.
Si Pepito ang mangulo sa One Cebu Party sa dakbayan nunot sa hungihong nga dili magpadagan og mayor ang partido atbang ni Mayor John Henry “Sonny” Osmeña.
“We can confirm that Nick Pepito will be One Cebu's candidate for vice mayor,” nagkanayun si Kongresista Gwendolyn Garcia, ang pangulo sa partido.
Si Osmeña nanghinaut nga matinuod nga wala siya’y kaatbang human iya’ng gipadayag ang pagsuporta kang Garcia sa pagpasubli sa pagka-kongresista apan dili siya manghilabot sa modagan sa pagka-gobernador.
Apan matud ni Osmeña kinsa usa ka independente nga dili siya makasuporta kang Pepito sanglit anaa man si Bise Mayor Antonio Yapha Jr. sa Liberal Party nga iya’ng kaalyado.
Apan pasidaan ni Osmeña sa LP nga kung may padaganon sa pagka-mayor batok kaniya, mapugos siya pagsuporta sa igsuon ni Garcia nga si kanhi bokal, Atty. Winston Garcia, sa pagka-gobernador.
Sa pagkakaron si Pepito lang ang nitumaw nga bugtong makig-atbang ni Yapha gumikan kay dili na siya makapasubli sa pagka-konsehal sa 2016 hinungdan nga siya ang gikonsiderar sa One Cebu .
Una’ng napili si Pepito isip numero uno nga konsehal sa dakbayan sa Toledo niadto’ng 2001. Sa 2004, napakyas siya sa pagpapili sa pagka sakop sa hunta probinsiyal hinungdan nga nagpapili siya og balik pagka-konsehal sa 2007 ug nahimutang sa ika-pito sa napulo ka konsehal.
Sa 2010 ug 2013, nahimutang pagbalik si Pepito sa numero uno nga konsehal. Ang anak niya nga si Ricardo “JR” Pepito numero uno usab nga konsehal sa barangay Tisa, dakbayan sa Sugbo sa pagkakaron. (BANAT NEWS)
- Latest
