Danish may kuyog 16-anyos gidakop

CEBU, Philippines - Gidakop ang usa ka Danish sa kapolisan ug sakop sa Inter-Agency Council Against Trafficking (IACAT) human nakit-i nga may kauban nga 16-anyos nga babaye nga paingon na unta mosakay og bus sa Cebu South Bus Terminal pasado alas 4 niadto’ng nakalabay nga hapon.

Ang suspek giila nga si Schibbye Peter Sten, 53, usa ka architectural engineer nga temporaryo nga nagpuyo sa lungsod sa San Fernando.

Ang 16-anyos giila nga taga sitio Baksili, Ocaña, dakbayan sa Carcar.

Matud ni Fiscal Simaco Labata nga gikan sa Bohol ang langyaw ug minor de edad ug pag-abot sa Pier 1, nasigpatan sa sakop sa IACAT ug gisundan hangtud sa CSBT.

Nakig-alayon ang IACAT sa mga polis nga nadestino sa terminal hangtud nasikop ang suspek.

Apan ang abogado sa langyaw nga si Atty. Dexterius Ypanto niingon nga wala’y relasyon ang langyaw ug minor de edad ug igo lang nangaplay og trabaho ang 16-anyos ug niuban sa langyaw sa Bohol apan duna pa sila’y laing mga kuyog.

Ang langyaw ug ang batan-on nagkuyog sa pag-uli kay pareho sila og paulian.

Sigun pa ni Ypanto nga ang langyaw ang usa sa mga architectural engineers sa mga gitukod nga building sa Sugbo ug duna sab kini negosyo nga buy-and-sell nga taud-taud na nga nagpuyo dinhi sa nasud.

Kaso’ng child abuse ang gipasaka batok sa langyaw nga kasamtangan nga gitanggong sa selda sa Carbon Police Station samtang ang batan-on gikustodiya una sa buhatan sa DSWD.

Plano sab sa abogado sa langyaw nga sa Lunes mobutang sila og piyansa alang sa iyang temporaryo nga kagawasan. (Jojo C. Ugdol/GMR)(BANAT NEWS)