Davide pahusayon sa bangi sa LP
CEBU, Philippines - Responsibilidad ni Gobernador Hilario Davide III ang paghilot sa kasungian sa mga sakop sa Liberal Party sa Sugbo.
Matud ni Senador Teofisto Guingona III nga si Davide isip provincial chairman sa LP ang modesisyon kung kinsa ang suportahan sanglit siya ang nasuhito sa lokal nga sitwasyon.
“Sila nala’ng ang in-charge sa pagsulbad ana. Kami sa national (LP), siyempre di namo mailhan ang tanan, dili namo mahibaw-an ang kahimtang, mga specific circumstances.
Mas maayo ang nakahibawo ug ang nagpuyo dinha ang magsulbad, dili kami’ng mga national,” dugang ni Guingona kinsa bise-presidente sa LP-Mindanao.
Ang dakbayan sa Lapu-Lapu ug Talisay ang may problema sa LP gumikan sa panag-atbang sa ilang tigpaluyo.
Sayo niini si Davide nagkanayun nga adunay himuong panagtigum ang mga sakop sa LP kauban ni DILG Secretary Mar Roxas II aron tukion ang problema sa partido. (Christell Fatima M. Tudtud/GMR)(BANAT NEWS)
- Latest
