State of calamity sa probinsiya palugwayan
CEBU, Philippines - Posible’ng lugwayan sa kagamhanan sa probinsiya sa Sugbo ang pagpaubos sa state of calamity sa tibuok probinsiya nunot sa pahibawo sa PAGASA nga mograbe pa ang El Niño nga molungtad sa pipila ka buwan.
Niadto’ng Mayo ang tibuok probinsiya gipaubos sa state of calamity tungod sa grabe’ng kainit ug mapupos unta human sa unom ka buwan.
Matud sa hepe sa Provincial Disaster Risk Reduction Management Office, Baltazar Tribunalo, nga mananghid sila sa gobernador ug sa hunta probinsiyal sa paglugway sa deklarasyon.
Apan si Gobernador Hilario Davide III uyon na nga lugwayan ang deklarasyon.
Matud ni Davide nga ang probinsiya aduna pa’y igo’ng pundo sa calamity fund. Ang PDRRMO adunay kapin sa P40 milyones nga budget alang sa El Niño Response Plan ug ang nagasto niini kapin sa P20 milyones ug kapin sa P10 milyones na lang ang nahibilin sa pundo. (Brenda D. Batuto/GMR)(BANAT NEWS)
- Latest
