Minilyon sa APEC magpabilin sa Sugbo
CEBU, Philippines – Dul-an sa 50 ka tour packages ang nahalin nunot sa pagpahigayun sa Asia-Pacific Economic Cooperation (APEC) Summit.
Matud ni Rowena Montecillo, director sa Department of Tourism-7, nga daku kini nga benepisyo nga makuha sa pag-host sa Sugbo sa kalihukan.
Ang matag package nagkantidad sa P2,500 ngadto sa P3,000 matag tawo ug ang top 3 economies nga namalit sa tour package gilangkuban sa USA, China ug Taiwan.
Subay niini, si Asteria Caberte, regional director sa Department of Trade and Industry-7, nagkanayun nga ang matag delegado sa APEC mogasto og average nga $100 matag adlaw alang sa shopping ug pagkaon.
Ang APEC aduna’y 6,000 ka delegado.
Dugang ni Caberte nga gipaneguro nila nga wala’y mahitabo’ng pagpaburot sa presyo sa mga produkto ilabi na sa mga pasalubong tungod kay kanunay nila kini’ng gi-monitor.
Si Boy Galvez, deputy director-general sa Philippine Information Agency (PIA), nihangyo sa publiko nga mopasensiya sa nasinati’ng kahasol sa pagpahigayun sa APEC sa Sugbo ilabi na huot sa trapiko tungod kay temporaryo lang kini.
Matud niya nga ang mga bisita kinahanglan nga hatagan og maayo’ng pagtagad ug pag-atiman alang sa kauswagan. – /GMR) (BANAT NEWS)
- Latest
