Dengue sa Central Visayas hinay ang pagsaka
CEBU, Philippines – Hinay ang pagsaka sa kaso sa dengue sa Central Visayas base na sa record sa Regional Epidemiology and Surveillance Unit (RESU)-7.
Matud ni Rennan Cimafranca, hepe sa RESU sa Department of Health-7, nga dunay pipila ka lugar nga kalit ang pagsaka sa kaso sama sa lungsod sa Sagbayan sa Bohol diin nideklarar sila og outbreak niadto’ng nilabay’ng duha ka semana.
Gipaabot usab nga ang ahensiya modeklarar og outbreak sa dengue sa Guihulngan ug Canlaon City sa Negros Oriental.
Mga nagpundo nga tubig ang usa sa hinungdan sa pagdaghan sa kaso.
Nisaka og 10.3 porsiyento ang kaso sa dengue sa Rehiyon 7 sukad Enero hangtud Agosto nga niabot og 3,460 ug 19 ang patay samtang sa niagi’ng tuig sa susamang mga buwan anaa lang sa 3,138 ka kaso ug 13 ang patay.
Nag-una gihapon ang Cebu City nga may 630, gisundan sa Lapu-Lapu City nga may 133, Sagbayan, 129; Dumaguete City, 106; Tagbilaran City,107; Toledo City, 102; Guihulngan, 100 ; Liloan, 99 ; Consolacion, 84; Mandaue City, 83; Argao, 77; Carcar, 68; Balamban, 60; Talisay City, 58; Carmen, 56; Minglanilla, 53; Canlaon City, 50; Jagna, 46; Siaton, 39 ug Sibulan, 38. – /GMR) (BANAT NEWS)
- Latest
