Paghimo sa polis nga bodyguard ipaimbestigar

CEBU, Philippines – Imbestigahon sa Cebu Police Provincial Office (CPPO) ang report nga adunay mga polis sa Dumanjug apil ang pipila ka sakop sa Special Weapon and Tactics (Swat) team nga gigamit nga bodyguard sa bise mayor ug konsehal sa lungsod.

Ang Provincial Investigation and Detective Management Branch (PIDMB) nga gipangulohan ni P/Supt. Brendo Nacario maoy gimandoan ni Provincial Director Noel Gillamac nga mosusi sa reklamo ni Dumanjug Mayor Nelson Garcia.

Matud ni Gillamac nga giawhag usab niya ang mayor nga moabag sa imbestigasyon pinaagi sa pagpresentar og mga saksi nga magmatuod sa iyang gisumbong nga may mga polis sa Dumanjug nga gihimo lang bodyguard nila ni Vice Mayor Efren Gica ug Konsehal Erwin Gica.

Gipatawag na usab ni Gillamac ang hepe sa Dumanjug Police Station nga si Senior Inspector Jose Rovic Villarin aron mohatag sa iyang pamahayag kabahin sa pasangil sa mayor.

Si Mayor Garcia ug ang Bise Mayor kontra sa politika diha sa lungsod sa Dumanjug. Matud ni Gillamac nga dili siya mosugot nga ang mga polis himuon lang bodyguard sa mga politiko. – /RUB) (BANAT NEWS)