Piskat, hi-blood nitumaw sa APEC

CEBU, Philippines – Gibutyag ni Rennan Cimafranca, pangulo sa Regional Epidemiology and Surveillance Unit sa Department of Health-7 nga dunay nangasakit sa mga delegado sa Asia-Pacific Economic Cooperation (APEC) Summit sa Sugbo.

Hinuon ginagmay lang kini nga problema ug dili angay ika-alarma tungod kay naatiman ra usab dayun sa medical team nga naka-standby.

Matud sa ahensiya nga dunay usa ka delegado ang nataptan og piskat kinsa gihatagan og antibiotic ug giawhag nga magpundo una sa kwarto ug dili una motambong sa mga kalihukan aron dili makatakod sa uban.

Wala hinuon gibutyag sa RESU ang ngalan sa mao’ng delegado apan nasuta nga duha ka adlaw kini’ng gi-obserbahan human dali nga nahatagan og tambal.

Gawas sa piskat, adunay laing problema nga nitumaw sama sa hypertension nga natala sa kapolisan ug kabomberohan nga gihulagway ni Cimafranca nga isolated lang.

Gihulagway ni Cimafranca nga gawas sa mao’ng problema, wala sila’y natala nga mga dagku’ng panghitabo.

Samtang ang mga ambulansiya sa DOH kanunay usab nga naka-andam aron kun adunay mga emerhensiya nga mahitabo dali ra kini’ng matubag. – /GMR) (BANAT NEWS)