Daghang shabu nasakmit, pito ka tawo nadakpan

CEBU, Philippines – Kapin sa P300 mil nga kantidad sa shabu ang nasakmit sa kapolisan ug pito ka tawo ang ilang nadakpan sa managlahi nga operasyon nga gihimo didto sa Liloan ug sa Barangay Bacayan, dakbayan sa Sugbo.

Ang buwag nga pagpangronda gihimo sa kapolisan sa Liloan ug sa mga sakop sa PNP Criminal Investigation and Detection Group-7, kagahapon ug kaniadtong Domingo.

Ang pagpangronda nga gihimo didto sa Barangay Yati, Liloan gibase pinaagi sa search warrant nga giisyu ni RTC Judge Teresita Galanida.

Si Senior Inspector Ramil Morpuz nga maoy hepe sa Liloan Police Station maoy nangulo sa mga polis nga unang mironda sa balay ni Christopher Pepito, 30, sa Sitio Dabong.

Ang balay ni Pepito nakuhaan og duha ka dagko nga bulto sa shabu ug pito ka gagmay nga pakete nga may sulod gihapon nga ilegal nga drugas.

Gawas kang Pepito, nadakpan sa kapolisan sila si Ronald Nalinga, 30, nga nakuhaan og tulo ka gagmay nga pakete, ug Rachel Bugtai, 27, nga nakuhaan usab og lima ka gagmay nga pakete sa shabu.

Matud pa nga mikantidad og P100 mil ang tanang shabu nga nasakmit sa kapolisan gikan sa tulo ka dinakpan.

Gisunod pagronda sa kapolisan ang balay ni Jay Sidon, 33, minyo ug nasakmitan na usab og usa ka dako’ng bulto sa shabu.

Nadakpan ‘sab sulod sa balay ni Sidon ang duha ka tawo nga sila si Lenwell Tudio, 22, nga nakuhaan og tulo ka pakete ug Charlemine  Abrea, 25, nakuhaan og tulo ka pakete nga shabu.

Gibana-bana nga mokabat sa P102 mil ang kantidad sa mga drugas nga nasakmit sa kapolisan gikan sa laing tulo ka dinakpan.

Samtang ang mga sakop sa CIDG-7 misikop ‘sab sa gidudahang level 2 drug pusher diha sa Barangay Bacayan, dakbayan sa Sugbo kagahapon sa buntag.

Ang dinakpan giila nga si Arnel Irinque, 44, kinsa nasakmitan og daghang shabu nga ang tanan gibana-bana nga mokantidad og P118 mil.

Sumala pa ni Supt. Fermin Armendarez, deputy chief sa CIDG-7, nga mga duha ka semana sila nga naniid ni Irinque human nila mahibaw-i nga namaligya kini’g shabu.

Armado og search warrant nga gi-isyu ni RTC Judge  Soliver Peras,  gipakalitan og ronda sa CIDG ang balay ni Irinque

Giangkon ni Irinque nga namaligya siya og shabu nga matud niya ang suplay gikan sa Barangay Pasil.

Gitanggong sa karsel sa CIDG-7 ang suspetsado nga pasakaan og kaso paglapas sa Comprehensive Dangerous Drugs Act. – /RUB) (BANAT NEWS)