Binilanggo gusto’ng magboksidor

CEBU, Philippines – Dili lang ang pagsayaw sa mga dancing inmates ug ang pagluto sa mga lamian nga pan sa mga baker ang gikalingawan karon sulod sa Cebu Provincial Detention and Rehabilitation Center (CPDRC).

Gikalingawan ‘sab diay diha sa CPDRC ang binukbokay sa kinumo pinaagi sa boxing isip kabahin sa rehabilitation program sa mao nga jail facility.

Usa ka boxing inmate ang inanay mituyhakaw ang pangalan sa natad sa boksing human niya gibuntog ang iyang mga kontra, dili lang ang sama niya nga mga binilanggo, kon dili, apil ang mga boksidor gikan sa gawas nga manulong sa CPDRC.

Siya si Jimmy Bairan nga naila sa iyang “ring name” nga Dagul tungod sa iyang mubo apan baskulado nga lawas inubanan sa bug-at nga kinumo nga maoy makapukan sa iyang mga kontra.

Una nga napagya ang ngalan ni Dagul sa national television Eye Witness, usa ka TV documentary program, gumikan sa iyang katakos sa sinukliay sa kinumo.

Usa si Dagul sa 15 ka boksidor nga gibansay sulod sa CPDRC kay mipakita og kaikag sa mao nga matang sa paugnat sa kusog nga maoy naghatag usab og paglaum sa pareho nila nga nagpuyo luyo sa rehas nga puthaw.

Nasayran nga wala’y kahibangkaagan si Dagul sa pamoksing sa wala pa siya mabilanggo ug wala usab siya mangandoy nga mahimo nga boksingero.

Usa lang ka yano nga magbabaol si Dagul sa bukirang dapit sa lungsod sa Catmon, amihanang bahin sa lalawigan sa Sugbo.

Nausab ang iyang kinabuhi niadtong tuig 2010 diha nga napriso siya sa kaso nga frustrated murder. Napusilan niya ang iyang usa ka paryente diha nga tigbason unta siya niini.

Hinoon bisan og wala niya maintimano ang biktima, apan gipasakaan gihapon siya og kaso hinungdan nga nagtingkagol si Dagul karon sa bilanggoan samtang nagpadayon ang husay sa kaso.

Gipadayag ni Dagul nga igo ra niya nga gidepensahan ang iyang kinabuhi, apan tungod kay nakasala man siya, andam niya kini nga atubangon.

Tuig 2013 diha nga gisugdan ang boxing rehabilitation program sa CPDRC diin nahimo nila nga inspirasyon si Pambansang Kamao Manny Pacquiao nga mibisita sa bilanggoan niadtong higayona.

Misamot ang kasibot sa mga CPDRC boxing inmates diha nga nakita nila sa personal ang ilang idolo nga si Pacman lakip na si Dagul nga misundog sa estilo sa pagpauwan og mga kinumo ni Manny.

Imposible man apan kun hatagan og kahigayonan, pangandoy ni Dagul nga ma-sparring niya ang Pambansang Kamao aron makuha niya niini ang mga pamaagi sa pagpukan sa kontra.

Buntag ug hapon lang ang pag-insayo sa mga boksidor sa CPDRC gamit ang kahimanan nga gi-donate lang usab sa mga nagpakabana nga personalidad.

Limitado lang ang training sa mga boksingero sanglit huot man ang jail facility dili sama sa gawas nga mahimo’ng maka-jogging.

Adunay mga away matag karon ug unya sulod sa pasilidad diin ikasangka sa mga boxing inmates ang mga boxer gikan sa gawas sa bilanggoan nga mosulong sa prisohan.

Gipadayag ni Dagul nga gusto niya nga mopadayon sa pagbansay-bansay aron mahimo siya nga professional boxer.

Sa matag kadaugan ni Dagul sa boksing sulod sa prisohan makasapi siya og usa ka libo. Kun mapilde, P500 nga dako na og matabang sa iyang panginahanglanon.

Sa usa ka kumbate ni Dagul, gipalukapa niya ang iyang kontra sulod sa 39 segundos sa una nga hugna pa lang sa ilang away.

Alang ni Jimmy Bairan kon Dagul nga ang nahitabo sa iyang kinabuhi nalatid nang daan sa iyang kapalaran aron kakuhaan niya og leksyon.

Bisan pa man sa kangitngit sa iyang kinabuhi sulod sa bilanggoan, apan matud pa nga wala mapalong ang iyang paglaum ug pagtoo sa Ginoo diin makita kini sa patik sa Imahen ni Hesus sa iyang dughan.

Panapos nga saysay ni Dagul nga kun mahatagan siya og kahigayonan nga mahimong gawasnon pag-usab, ipadayon niya ang iyang gitinguha nga tingusbawan isip boksingero nga mao usab ang gisaad kaniya sa tagdumala sa CPDRC nga si Marco Toral nga siya suportahan.

Matud ni Dagul nga dili niya usikan ang kahigayonan kun mahatagan man siya og second chance.