Camp Robredo ipangan sa RTS-7
CEBU, Philippines – Giaprobahan sa Ubos Balay-Balauranan ang pagngalan sa Philippine Public Safety College –Regional Training School-7 sa lungsod sa Consolacion ngadto na sa Camp Jessie M. Robredo Regional Training Center-7, National Police Training Institute, PPSC.
Ang House Bill No. 5953 giaprobahan ubos sa rekomendasyon sa House Committee on Higher and Technical Education nga gipangulohan ni Kongresista Roman Romulo sa Pasig City.
Si Kongresista Gabriel Luis Quisumbing sa ikaunom nga distrito sa probinsiya sa Sugbo diin nasakop ang lungsod sa Consolacion niduso niadto’ng Abril 13, 2015 sa House Bill No. 5661 sa pagngan sa PPSC-RTS7 ngadto na sa PPSC-Camp Jessie M. Robredo.
Niadto’ng Agosto 18, 2012, si Robredo kinsa mao’y kalihim sa Department of Interior and Local Government ang nangulo sa groundbreaking ceremony sa PPSC’s RTS sa Consolacion.
Human sa kalihukan, si Robredo namatay sa pagkahagsa sa pribado’ng eroplano nga iya’ng gisakyan gikan sa Sugbo.
Si Robredo gitahud sa iya’ng ligdong nga liderato ug pagpangalagad sa katawhang Pilipinhon.
Matud ni Quisumbing nga angayan lang nga ipahinungod kang Robredo ang pagngan sa kampo nga ubos sa pagdumala sa DILG nga iya’ng naalagaran.
Sa mao’ng kampo himuon ang pagbansaybansay sa mga sakop sa Philippine National Police, Bureau of Jail Management and Penology, ug Bureau of Fire Protection.
Ang mga kurso naglakip sa Public Safety Basic Recruitment Course, Public Safety Junior Leadership Course, ug Public Safety Senior Leadership Course. (BANAT NEWS)
- Latest
