Peace month sugod ugma

CEBU, Philippines – Sugdan ugma ang nagkalainlaing kalihukan sa National Peace Month.

Sa siyudad sa Sugbo, ang mga batan-on ug mga tinun-an ang nilusad sa “Peace Na Ta Movement” aron sa pag-edukar sa kabataan labot sa pagpihig sa kultura, relihiyon ug ethnic identity sa katawhan.

Si Jamil Faisal Adiong, presidente sa Federation of Muslim Students Association, niangkon nga aduna lang gihapo’y diskriminasyon sa katilingban tungod sa limitado nga panghunahuna sa katawhan sa komunidad sa mga Muslim.

Matud ni Adiong nga sa Kabisay-an, ang pulong Moro nagpasabot nga mga maldito ug dili kini nagpasabot nga mga Muslim.

Ang kampanya gisuportaan sa konseho sa dakbayan sa Sugbo aron ipakita ang paghiusa sa katawhan ug ipakita ang importansya sa kalinaw aron makab-ot ang pag-uswag sa nasud.

Niadtong August 17, ang konseho nipasar og resolusyon nga giduso ni Konsehal Alvin Dizon, kinsa chairperson sa committee on youth and sports development, ug sa committee on education, science and technology.

Ang mga kalihukan sugdan sa usa ka “solidarity gathering” sa Fuente Osmeña Circle diin giimbitar ang katawhan sa pagtambong nga himuon sa alas 7:30 sa gabii.

May mga forum nga himuon sa Septiyembre 4, 11 ug 18, sa University of San Carlos.

Sa mga Domingo adunay mga interfaith sessions nga pasiugdahan sa National Commission of Muslim Filipinos ug peace yoga sessions nga himuon sa Chu Un Temple.

Gidapit usab ang tanan alang sa ikaduha’ng “solidarity gathering” alang sa International Day for Peace sa Plaza Independencia nga sugdan sa alas 5 sa buntag. – /GMR) (BANAT NEWS)