Gikan nga naghatud og uyab naligsan

CEBU, Philippines – Usa ka 15-anyos nga lalaki nga gikang naghatod sa iyang uyab didto sa Danao namatay human kini napasok sa luyong ligid sa prime mover samtang nagsakay og motor didto sa Barangay Poblacion, Carmen kaniadto’ng Sabado sa kaadlawon.

Ang namatay mao si Kent Blair Piñas, nga taga Barangay Triumfo, Carmen nga naligsan sa prime mover nga gimaneho ni Jeffrey Puagado, 30, taga Barangay Tabok, Mandaue City.

Sumala pa ni Traffic investigator Jerome Quemque sa Carmen Police Station nga sa wala pa ang hitabo gikan naghatod sa iyang uyab si Piñas didto sa Barangay Langlang, dakbayan sa Danao.

Dugang ni PO3 Quemque nga giingnan pa si Piñas sa iyang uyab nga moderitso og uli sa Barangay Triumfo nga nahimutang sa bukirang bahin sa Carmen nga duol ra sa Danao.

Apan imbes nga moderitso og pauli, didto hinuon kini mipaingon sa Poblacion ug diha nga milabang kini sa crossing, napasok siya sa ligid sa prime mover ug naligsan.

Wa makabantay ang drayber sa prime mover tungod kay didto man siya mapasok sa luyo nga bahin ug nahibulong na lang si Puagado nga miuntol ang ligid nga hawan man unta ang karsada.

Matud pa nga nagkasinabot ra ang pamilya sa namatay ug ang drayber nga abagahon lang niya ang gastohan sa pagpalubong sa namatay aron dili na lang mopasaka og kaso ang pamilya sa biktima.

Sanglit 15-anyos pa ang biktima, wala pa siya’y lisensya sa pagmaneho og sakyanan. – /RUB) (BANAT NEWS)