Traffic enforcers alerto sa rally sa Iglesia

CEBU, Philippines - Ang katawhan giawhag sa kadagkoan sa Cebu City Transportation Office nga dili lang mosuroy ugma aron malikayan ang problema sa trapiko atol sa martsa ug rally sa mga sakop sa Iglesia ni Cristo.

Si Rey Gealon, executive officer sa City Transportation Office, miingon nga modistino sila og mga traffic enforcers sa mga karsada nga agian sa magmartsa nga mga sakop sa Iglesia paingon sa Plaza Independencia.

Ang martsa magsukad diha sa simbahan sa Iglesia sa General Maxilom Avenue. Nagtagbo ang kadagkoan sa Iglesia didto sa opisina ni Vice Mayor Edgardo Labella.

Gituohan nga gatusan ka sakop sa Iglesia ang mosalmot sa martsa ug rally isip kabahin sa ilang pagprotesta sa kamandoan sa Department of Justice (DOJ) nga mihatag og pagtagad sa reklamo nga gipasaka batok sa ilang mga lider.

Naglaum hinuon si Gealon nga ang rally sa Iglesia ugma dili makaapektar sa trapiko kay naatol man usab nga “holiday” tungod sa pagsaulog sa national heroes day. Ang kaso nga gipasaka batok sa mga lider sa Iglesia nagumikan sa giingon nga pagpangidnap ug pagpanghasi nga gihimo ngadto sa gipalagpot nila nga kanhi ministro.  (BANAT NEWS)