Motor nabangga sa bus backrider patay
CEBU, Philippines - Patay ang backrider ug grabe’ng naangol ang drayber sa motorsiklo nga nasungag sa gikasugat nga Ceres Bus sa sitio Tinikdan, Daan Catmon, lungsod sa Catmon alas 6 ang takna sa niagi’ng gabii.
Si Police Officer 2 Joseph Ares sa Catmon Police Station niila sa namatay nga si Baltazar Luardo Jr., 33, ug ang maguwang nga si Lloyd Luardo, 34, ang grabe ang kahimtang.
Gikan sa dakbayan sa Sugbo ang motorsiklo ug may gisundan nga multicab nga hinay kaayo nga nagdagan nga nakaaghat ni Llyod sa pag-overtake apan nabangga sa bus nga gikasugat.
Ang duha dali nga gihatud sa Bogo Provincial Hospital apan si Baltazar nga nakaangkon og grabe’ng kadaut sa kalawasan ang gideklarar sa mga doktor nga dead on arrival.
Si Llyod ang gibalhin sa Vicente Sotto Memorial Medical Center samtang ang drayber sa bus nga si Leo Montellano ang temporaryo nga gitanggong sa Catmon Police Station. (Romeo T. Limpangog/GMR)(BANAT NEWS)
- Latest
