Balay gikawatan, gidad-an og sakyanan
CEBU, Philippines - Mokabat sa P200 mil nga kantidad sa mga kabtangan ang nahanaw gikan sa usa ka panimalay nga nabiktima sa mga kawatang nagdala og sakyanan diha sa Brgy. Magay sa Compostela.
Si Senior Police Officer 3 Pedro Enriquez sa Compostela Police Station miingon nga ang caretaker sa maong panimalay nga si Khonie Diana diha sa maong dapit misumbong nga gilungkab ang gibantayan niining balay.
Matud pa ni Enriquez, manglimpiyo unta sa palibot si Diana niadtong tungora dihang iyang nabantayan nga nagkaguliyang na ang mga gamit sa sud sa iyang agalon nga atoa sa nasud sa Australia.
Nasuta nga nakasulod ang mga kawatan pinaagi sa pagtangtang sa aircondition unit ug gipanghakot ang mga butang sa sud nga naglakip sa siyam ka computers nga kompleto sa mga printers , refrigerator, telebisyon, mga DVD players ug copying machine ug uban pa.
Nagtuo ang kapolisan nagdala og sakyanan ang mga kawatan. (BANAT NEWS)
- Latest
