Skywalks ipagamit na g’yud

CEBU, Philippines – Pugson na ang mga pedestrians diha sa Brgy. Canduman sa dakbayan sa Mandaue sa paggamit sa skywalk diha sa eskina H. Abellana sa Brgy. Canduman ug dalan J. P. Rizal sa Brgy. Basak, sa dakbayan sa Mandaue.

Kini aron malikay sila sa disgrasya human sa nahitabong aksidente sa nangaging mga adlaw diin nangaigo ang mga pedestrians tungod kay nitabok sa dalan imbes nga sa skywalk niini.

Si Glenn Antigua, executive officer sa Traffic Enforcement Agency of Mandaue (TEAM) miingon nga magbutang na sila og mga traffic enforcers ug magpatabang sila sa mga tanod sa Brgy. Basak aron pagsiguro nga way tawong maglabang-labang nga di moagi sa skywalk.

Diha sa maong dapit nahitabo ang aksidente diin usa ka pastor sa relihiyosong tinuohan nga nagsakay sa iyang motorsiklo nga naligsan sa delivery truck nga nawad-an sa iyang brake.

Gikabalak-an nga dili magdugay dunay pedestrians usab nga mapunggit sa mga sakyanan dihang dapita tungod kay dulhogon ang maong dalan ug uwahi na kaayong mabantayan sa motorista kun dunay molabang.

Nagtuo si Antigua nga di ganahan ang mga tawo paggamit sa maong skywalk tungod kay habog ang hagdanan. – /EIM) (BANAT NEWS)