Dugang E. Traffic Lights sa Mandaue City
CEBU, Philippines – Dugang traffic lights ug close circuit television (CCTV) cameras ang ipahimutang sa mga eskina nga mga dalan sa dakbayan sa Mandaue sa mosunod nga mga adlaw.
Kini maoy gibutyag ni Glenn Antigua, executive officer sa Traffic Enforcement Agency of Mandaue (TEAM) sa Banat News kagahapon.
Matud pa ni Antigua butangan niini ang eskina sa Canduman ug Highway sa Barangay Basak nga pirmeng adunay maaksidente.
Sumala pa ni Antigua aduna silay lima ka mga electronic traffic lights nga adunay CCTV cameras ug laing pito ka mga CCTV cameras nga ilaha pang pangitaan og kabutangan.
Ang makuha sa CCTV cameras ma-monitor diha sa Command Center sa dakbayan.
Nagtuo si Antigua nga ang pagbutang sa maong mga ekipo makapamenus sa problema sa trapiko ug ingon man mga aksidente.
Siyam pa lamang ka eskina sa dakbayan sa Mandaue ang natauran og mga electronic traffic lights nga dunay mga CCTV camera.
Ang dakbayan migahin og P40 milyones alang sa electronic traffic lights nga makita na karon sa eskina A.C. Cortes Avenue ug S.B. Cabahug, eskina Plaridel ug A.C. Cortes Avenue, U.N. Avenue ug dalan Plaridel, A.S. Fortuna ug M.C,. Briones, dalan Plaridel ug eskina Catalino Ouano Avenue ug Ouano Avenue ug Mantawi road sa reclamation area sa maong dakbayan. – /EIM) (BANAT NEWS)
- Latest
