Way holidays sa APEC meet

CEBU, Philippines - Ang probinsiya dili modeklara og holiday niining pagpahigayon sa Asia-Pacific Economic Cooperation (APEC) summit tungod kay madala lang ang dagan sa trapiko.

Si Gobernador Hilario Davide, III nagkanayon nga wala na kinahanglana ang pagsuspenso sa klase ug wala na usab kinahanglana ang pagdeklara og holiday.

Niadtong Huwebes nangabot na nganhi sa Sugbo ang ubang mga delegado sa APEC ug karong adlawa (Sabado) ang unang adlaw sa pagpahigayon sa Senior Officials Meeting.

Sa milabay’ng mga buwan sa pagpangandam sa APEC summit ang local organizing committee dunay plano sa pagdeklara og holiday  tungod sa kabalaka nga matanggong sa traffic ang mga delegado. Mokabat ngadto sa 85 ka meetings ang ipahigayon nganhi sa Sugbo ug gilauman nga kapin sa 3,000 ka delegado sa APEC ang manganhi nga matapos sa Oktubre niining tuiga.

Samtang gibuksan sulod sa Parkmall sa dakbayan sa Mandaue ang mga stalls diin gipamaligya ang mga lokal nga produkto sa Mandaue aron makadani sa mga delegado sa APEC meet.

Si Marlene Gatpatan-Bedia nga maoy executive director sa Mandaue Chamber of Commerce and Industry (MCCI) miingon nga nag-unang produkto  nga giladlad sa  “I  Am Mandue Shop” naglakip sa furnitures, fashion accessories, mga juice, dried mango,  bibingka, masareal, tagaktak ug uban pa. (Brenda D. Batuto ug Romeo Limpangog/EIM)(BANAT NEWS)