Gibukbok ang mga ulo

CEBU, Philippines - Gibukbok og magahi nga butang ang mga ulo sa manag-inahan nga gipatay diha sa Deca Homes sa Tungkil, Minglanilla.

Ang mga suspek mao sila si Manuel Gomera Labrador, 34, maoy gitudlong utok sa krimen, ug mga kaubang sila si Estelito Sasidor Recamora ug George Mamac Baquiran, pulos taga Lower Calajoan.

Ang tulo nadakpan human nadiskubrehan ang mga patay’ng lawas sa manag-inahang Virginia Sharpe, 37, ug Mica Ella Sharpe,11, nga gitagoan ug gisemento sa ilawom sa septic tank

Matud pa ni Police Chief Inspector Richard Gadingan, ang pangulo sa Minglanilla Police Station lig-on ang mga ebidensya ug testimonya nga ang tulo ang nagpatay sa duha ug kasohan sila og double murder.

Matud pa ni Gadingan nga migawas sa otopsiya nga namatay ang duha pinaagi sa pagbukbok og magahi nga butang diha sa ilang mga ulo, samtang migawas sa otopsiya nga wala lugosa ang duha una pa gipatay.

Nagduda si Gadingan nga giapil pagpatay ang bata human kini nakakita sa pagpatay sa iyang inahan. “Posibleng kadtong bata gikan pa’to sa eskwelahan kay nakauniporme pa man siya. Lagmit giapil siya og patay kay basin nakakita siya sa krimen para wala nay witness,” teyoriya pa ni Gadingan.

“Di lang gyod ta mokompiyansa ilabi na og dili nimo suod nga higala, bisan pa og silingan na nimo para paglikay na lang g’yud,” pahimangno pa sa hepe.

Si Marife Debalahan ang auditor sa Deca 2 Tungkil Homeowners Association Officers nibutyag sa Banat News nga nakadawat sila og taho nga dunay tawo nagbahisbahis sa ilang lugar maong estriktuhon nila ang ilang seguridad.

Kadtong walay stickers nga sakyanan ug walay ID dili pasudlon alang sa seguridad sa mga namuyo sa lugar.

Gihulagway ni Debalahan nga maayong tawo ang namatay nga si Virginia kay dili kini hakog ug kanunay kini mohatag og hinabang sa simbahan ug updated usab kining mobayad sa iyang monthly dues sa asosasyon. Daghan sa mga residente sa lugar ang nasakitan sa ka brutal sa pagpatay sa manag-inahan.

Si Nerissa Maglasang, maestra ni Mica Ella sa David Solomon Learning Foundation nasubo tungod kay utokan nga bata ang namatay. "Nasubo ko kay bright siya gikan sa grade school ngadto sa grade five kanunay kining first honor, friendly pa gayud nga bata,"matud pang Maglasang.

Si Narcisa Quilojano, 71, inahan ni Virginia, gikan pa sa Zamboanga del Sur  naabot dinhi human  gipahibalo nga missing  ug dili na makontak sa selpon ang mga biktima.

Karong adlawa gipaabot nga moabot ang bana ni Virginia nga Briton kinsa sa sunod buwan pa unta moanhi apan tungod sa nahitabo dali kining mipauli dinhi sa Pilipinas. (Rowena Capistrano ug Jojo Ugdol/EIM)(BANAT NEWS)