Nasikop nga grupo susihon sa MCPO

CEBU, Philippines - Makig-alayon ang Mandaue City Police Office sa Cebu Provincial Police Office aron makakuha og impormasyon labot sa unom ka gituohang tulisan nga giingong sakop usab sa gun-for-hire nga nasikop sa Arpili, Balamban.

Kini aron pagsusi kung wala ba sa mga suspek ang nalambigit sa pagbanhig patay kang Atty. Amelie Alegre usa ka semana na ang nakalabay diin giingong unom ang nalambigit base sa nakita sa CCTV footages.

Nagkanayun si Senior Supt. Mariano Natuel Jr., officer-in-charge sa MCPO, nga dili imposible nga may kalambigitan ang mga dinakpan.

Gihulagway ni Natuel ang mga kriminal nga dili lang usa ka modus ang sudlan basta makakwarta lang.

Samtang nakapadala na ang kapolisan og opisyal nga request sa mga establesemento nga adunay CCTV camera nga naagian sa sakyanan sa namatay nga abogada.

Niadto’ng Miyerkules gipagawas ang facial composite sa posible’ng driver ug angkas nga giingong mao’y gunman sa nahitabo’ng pagpamanhig nga niangol usab kang Atty. Briccio Boholst ug kauban nga si Antonio Pino.

Malaumon si Natuel nga wala pa ka gawas sa Sugbo ang mga mamumuno ug duna na sila’y team nga nag-monitor niini.

Karong adlawa ipahigayun ang ikatulo’ng case conference sa mao’ng kaso diin hisgutan ang mga nataligam-an nga mga pangutana sa kaso nga angayan matubag.  (BANAT NEWS)