Mama, anak gipatay

CEBU, Philippines - Nagsugod na og kadugta dihang nadiskubrehan ang mga patay’ng lawas sa manag-inahang gipatay ug gilubong sa ilawom sa septic tank sa ilang balay diha sa Deca Homes, Brgy. Tungkil sa lungsod sa Minglanilla kagahapon sa buntag.

Giila ang mga biktima mao sila si Virginia Sharpe, 37, ug ang iyang anak nga si Mica Ella, 11.

Pipila ka oras human nadiskobrehan sa kapulisan ang mga lawas sa mga biktima nasikop ang tulo ka mga suspetsado sa krimen nga mga panday ug nagtrabaho sa balay sa mga biktima nga sila si Manuel Labrador, Espelito Ricamora ug George Baquiran, pulos taga Lower Calajoan sa maong lungsod.

Si Chief Insp. Richard Gadingan, hepe sa Minglanilla Police nga nahinabi sa Banat News miingon alas-9 kagahapon sa buntag miduol sa ilang buhatan ang mga silingan sa biktima tungod kay nabantayan nila nga hapit na usa ka semana nga wala nila makita ang duha.

Hasta ang mga classmate sa bata sa usa ka pribadong tunghaan natingala usab kay wala kini mosud sa klase nga unta eksaminasyon nila , ang bata usa sa mga pilian aron ma-valedictorian sa ilang eskuylahan.

Tungod niini, gisubay sa kapulisan ang balay sa mga biktima ug  ilang nabantayan nga nanimaho na ang balay hinungdan nga ila na lang kini nga gipugos og abri ang pultahan ug didto dunay dagkong mga langaw sa may septic tank duol sa kusina.

Didto na gibungkag sa kapulisan ang septic tank ug nakita ang lawas sa inahan samtang sa kilid ang lawas sa 11 anyos nga gisulod og sako.

Si Gadingan miingon nga human niya nakita ang mga patay nga lawas mihimo gilayon sila og imbestigasyon ug ila dayong nahibaw-an ang kabahin sa mga panday.

Unang nadakpan si Labrador ug kini mitug-an sab dayon sa iyang laing duha ka mga kauban nga sila si Ricamora ug Baquiran.

Sa inisyal nga pagsubay sa kapulisan posibleng sa utang sa mga suspetsado ang motibo sa krimen. Ang mga suspetsado gikatahong duna’y 10 hangtod 15 mil nga utang kang Virginia ug gipaningil na sila niini.

Matud pa ni Jasmin Montero,  amiga ni Virginia nabalaka siya kay wala na niya makita iyang amiga ug wala na kini nag post sa Facebook ug dili na makontak ang cellphone niini maong nidangop siya sa mga otoridad.

Sa Facebook ni Virginia kinsa nagdala sa pangalan nga Jane Sharpe, kataposan niyang gi-post  ang kabahin sa mga tawong utangan nga masuko pa kung paninglon.

Si Labrador kinsa miangkong nakasuyop og drugas niadtong tungora, maoy nipakyaw sa pagpanday sa balay sa mga biktima mipasangil nila ni Ricamora ug Baquiran nga mao ang nipatay sa mga biktima ug ilang gilubong sa septic tank, gitabunan og plywood dayon gisemento ug gi-tiles ang ibabaw.

Apan si Ricamora kusganong miinsister nga igo ra siyang gitawag sa duha kay magpatabang og lubong sa patay nga iro, apan nakurat siya nga ang mga biktima diay kadto. Matud niya gihulga siya ni Labrador sa dala niining pistol kun di siya motabang.

Atol sa pagsikop sa kapulisan sa mga suspetsado ilaha ‘sab narekober ang selpon, camera nga iya sa biktima.  Duna pa’y uban nga mga gamit ang gikatahong gipangawat sa mga suspek,

“Sa pagkakaron makaingon na ta nga sulbad na ang kaso aning hitaboa, pero on going ang atong imbestigasyon basin naa pa’y laing apil ani,” matud pa ni Gadingan. Gisusi usab karon sa kapolisan ang posibilidad nga gilugos pa ang mga biktima una sila gipatay pinaagi sa pagdunggab. (BANAT NEWS)